ტრადიციული ქართული აივნების მოწყობით თანაბრად ინტერესდება როგორც ფიზიკური პირი, ისე ბიზნესი.
როგორც ქართული ავეჯის საწარმო Legaani-Art-ის დამფუძნებელი ბადრი ქართველიშვილი ”ბიზნესპარტნიორთან” აცხადებს, ქართული ორნამენტებით აივნების მოწყობით ინტერესია ტურისტული ინდუსტრიიდანაც, მათ შორის, სასტუმროებიდან და ღვინის მარნებიდან.
მოთხოვნა წელს (იანვარი-აპრილი), წინა წლის ანალოგიურ პერიოდთან შედარებით, დაახლოებით 20%-ით არის გაზრდილი.
Legaani-Art-ი მომხმარებლებს სთავაზობს სხვადასხვა სირთულის სამუშაოს, როგორიცაა ქართული ორნამენტების ამოჭრა, ხეზე ჭრა, რუტერზე ჭრა, 3D გრავირება, დეკორატიული პანელების დამზადება და სხვა. გარდა ამისა, კომპანია ამზადებს საბავშვო ავეჯს, რომელიც Legaani-Art-ის პარალელური მიმართულებაა.
ბადრი ქართველიშვილის ინფორმაციით, მოთხოვნა წლიდან წლამდე მზარდია როგორც დედაქალაქიდან, ასევე საქართველოს სხვადასხვა რეგიონიდან, მოწინავე პოზიციაზე კი რაჭა და კახეთია.
გარდა იმისა, რომ კომპანია მომხმარებელს ძველი ქართული ორნამენტების დიდ არჩევანს სთავაზობს, ხდება მათი გათანამედროვებაც და ახალი ელემენტებით გამდიდრება. წარმოების პროცესში გამოიყენება როგორც ხე, ასევე ე.წ. ფანერა (ხისგან დამზადებული დაფისებური ფორმის საკონსტრუქციო მასალა). ხის მასალისთვის ნედლეული ძირითადად ქართულია, ფანერა – იმპორტული.
”ვამზადებთ უამრავი სახის ორნამენტს, რომელიც შეიძლება იყოს აივნისთვის, ასევე კიბისა და სხვადასხვა ავეჯის და ინტერიერის დეკორი. სეგმენტი არის როგორც ფიზიკური, ასევე იურიდიული პირიც, ძირითადად სასტუმროები და ღვინის მარნები, რასაც შეკვეთების 50% უჭირავს. ყველა კუთხეს თავისი დამახასიათებელი ორნამენტი აქვს, ამიტომ როცა სამეგრელოდან გვიკვეთავენ, აქცენტი ავთენტურ სტილზე კეთდება ” – აცხადებს ბადრი ქართველიშვილი.
Legaani-Art-ის სამომავლო გეგმაშია ქართული ორნამენტების რაოდენობის გაზრდა (გაციფრულება) და ისეთი ფორმებისა და დიზაინების გამოყენება, რომლებიც დაცულია ქართულ არქივებში და წიგნებში. კომპანია მომხმარებელს შესთავაზებს უფრო მეტ და მრავალფეროვან პროდუქციას საქართველოს ყველა კუთხის ორნამენტების უკეთ გასაცნობად.
ცნობისთვის, Legaani-Art-ის საწარმო თბილისში, ლილოს დასახლებაში მდებარეობს. საწარმოს ფართობი 200 კვ/მ-ს -ს შეადგენს. კომპანიის გუნდი 4 ადამიანისგან შედგება.
bp.ge
