ლანჩხუთის ტურისტული შესაძლებლობები-ექსპერტის შეფასება

ლანჩხუთის ტურისტულის შესაძლებლობები – ექსპერტის შეფასება!

სერიიდან რა ყოფილა გურია

თუ ჯერ არ გაქვთ ლანჩხუთი თქვენს მოგზაურობების სიაში, დროა გეგმას გადახედოთ! გურიის ეს ულამაზესი კუთხე იდეალურია მათთვის, ვინც სურს:

✔ ბუნებასთან სიახლოვე

✔ ისტორიული მემკვიდრეობის შეგრძნება

✔ უნიკალური ეკოსისტემების გაცნობა

არ გადადოთ – ეწვიეთ, აღმოაჩინეთ და შეიგრძენით ლანჩხუთის მაგია!

ლანჩხუთი ხშირად ყურადღების მიღმა რჩება, თუმცა სინამდვილეში მას ბევრი უნიკალური ღირსშესანიშნაობა აქვს. ლანჩხუთის ტურისტულ პოტენციალს TREVELNEWS.GE-ს მოწვეული ექსპერტი, გეოგრაფიის დოქტორი და მოგზაური გიორგი დავალშვილი შეაფასებს.

-ლანჩხუთი საქართველოს ერთ-ერთი საინტერესოა კუთხეა. რა ხდის მას განსაკუთრებულს?

-პირველ რიგში, ეს არის ქვეყნის ყველაზე დაბალი წერტილი – გრიგოლეთის სანაპირო – საქართველოს ერთ-ერთი ყველაზე დაბალი წერტილი (1.5-2 მეტრი ზღვის დონიდან), რომელიც ლანჩხუთის მუნიციპალიტეტისა და ქალაქ ფოთის საზღვარზე მდებარეობს. ეს გეოგრაფიული ფაქტორი ლანჩხუთის ერთ-ერთი მთავარი სავიზიტო ბარათია და განსაკუთრებულ ტურისტულ პოტენციალს ქმნის.

გარდა ამისა, ლანჩხუთის ტერიტორიაზე მდებარეობს პალიასტომის ტბის ნაწილი, რომელიც კოლხეთის ეროვნული პარკის ფარგლებშია და იუნესკოს დაცულ ზონაში შედის.ასევე უნიკალურია მდინარე ფიჩორი, რომელიც ერთადერთი მდინარეა საქართველოში, რომელიც ჭაობების ლაბირინთს ქმნის.

მუნიციპალიტეტი მდიდარია ნამდინარევი ტბებით, რომლებიც წარსულში რიონის კალაპოტიდან წარმოიქმნა. აღსანიშნავია ტბა ჯაპანა, რომელიც ჭაობიანია, მაგრამ ნადირობის და თევზაობის მოყვარულებისთვის საინტერესო ადგილი შეიძლება გახდეს.

ტურისტებისთვის საინტერესო ადგილები:

• გრიგოლეთის სანაპირო – საქართველოს ყველაზე დაბალი წერტილი (1.5-2 მეტრი ზღვის დონიდან), რომელიც ლანჩხუთისა და ფოთის საზღვარზე მდებარეობს.

• მდინარე ფიჩორი – ერთ-ერთი ყველაზე იშვიათი ჰიდროსისტემა, სადაც ნაკადულები, ჭაობები და ტყეები უნიკალურ ეკოსისტემას ქმნიან.

• პალიასტომის ტბა – იუნესკოს დაცული ტერიტორია, კოლხეთის ეროვნული პარკის ნაწილი, სადაც ტორფიანი ჭაობები და ფრინველთა სამოთხე მდებარეობს.

ლანჩხუთის ისტორიული და კულტურული მემკვიდრეობა

– ლანჩხუთი არ არის მხოლოდ ბუნებრივი სილამაზით გამორჩეული, არამედ ისტორიული და კულტურული მემკვიდრეობითაც. რას ურჩევთ სტუმრებს?

– სულ ლანჩხუთის მუნიციპალიტეტში 1 ქალაქი, 15 თემი და ჯამში 55 სოფელია, თითოეულს კი თავისი უნიკალური ისტორია და საინტერესო ტურისტული ადგილები აქვს.

მაგალითად:

ხელოვნური გამოქვაბულები (ხორეთი, ჩანჩეთი, გაგური) – შუა საუკუნეებში გამოკვეთილი სამალავები, რომლებიც მოსახლეობას მტრის შემოსევების დროს იცავდა.

გაგურის ეშმაკის საყდარი – მეცნიერული კვლევის მნიშვნელოვანი ობიექტი.

ლანჩხუთში არის მხარეთმცოდნეობის მუზეუმი, სადაც ნეოლითის ხანიდან მოყოლებული უნიკალური ექსპონატებია დაცული. ტოლიფას ნამოსახლარი – ნეოლითური დასახლება, რომელიც კოლხეთის კულტურას უკავშირდება.

ძალიან საინტერესო ტურისტული ადგილია ეგნატე ნინოშვილის სახლ-მუზეუმი – მწერლის პირადი ნივთებითა და ხელნაწერებით, თუმცა ის, სამწუხაროდ, ადგილობრივ დონეზეც იშვიათად მოინახულება. მნიშვნელოვანია, რომ მსგავსი მუზეუმების პოპულარიზაცია მოხდეს.

– როგორ ფიქრობთ, რა ტიპის ტურიზმის განვითარება შეიძლება ლანჩხუთში?

– ლანჩხუთს აქვს პოტენციალი რამდენიმე ტიპის ტურიზმის გასავითარებლად:

• ეკოტურიზმი – კოლხეთის ეროვნული პარკის და ბუნებრივი ტბების არსებობა ხელს უწყობს ეკო-მოგზაურობის განვითარებას.

• ზღვისპირა ტურიზმი – გრიგოლეთი და მისი სანაპირო ზოლი განსაკუთრებით მიმზიდველია ზაფხულის ტურისტებისთვის.

• კულტურული ტურიზმი – მუნიციპალიტეტში არაერთი საინტერესო ისტორიული და ეთნოგრაფიული ადგილი მდებარეობს, რომელიც უფრო აქტიურად შეიძლება წარმოჩინდეს.

– რა არის ლანჩხუთის მთავარი ტურისტული კოზირი?

– ლანჩხუთის მთავარი კოზირი მისი ავთენტურობაა – ეს არის მუნიციპალიტეტი, რომელსაც ჯერ კიდევ არ შეხებია მასობრივი ტურიზმის ტალღა, რაც მას განსაკუთრებით მიმზიდველს ხდის მათთვის, ვისაც უნიკალური და ნაკლებად ცნობილი ადგილების აღმოჩენა სურს.

გულიანი – სოფელი, სადაც ისტორია და ბუნება ერთმანეთს ერწყმის

გულიანი ერთ-ერთი გამორჩეული სოფელია. შუა საუკუნეებში აქ არსებობდა გულის ფორმის ციხე, რომელიც თავდაცვით და რელიგიურ ცენტრად გამოიყენებოდა. ციხის ტერიტორიაზე წმინდა გიორგის ეკლესია იდგა, რომლის ნანგრევებიც დღესაც ჩანს. გარდა ამისა, მაქვს ინფორმაცია, რომ სოფელში არის ბუნებრივი გოგირდოვანი წყლების წყაროები, რომლებსაც სამკურნალო თვისებები აქვს. ადგილობრივები საუკუნეების განმავლობაში ამ წყლებს სხვადასხვა დაავადებების სამკურნალოდ იყენებდნენ, თუმცა ტურისტული ინფრასტრუქტურა ჯერ კიდევ არ არის განვითარებული.

ტბებზე სამონადირო ტურიზმის პოტენციალი

-რა შესაძლებლობები არსებობს ჯაპანას ტბაზე?

– ჯაპანას ტბაზე უნიკალური ჭაობიანი ტბაა, სადაც ბუნებრივად ბინადრობს წყლის ფრინველების მრავალი სახეობა. ადგილობრივები უკვე აქტიურად იყენებენ ამ ტერიტორიას ნადირობისთვის, თუმცა საჭიროა ინფრასტრუქტურის განვითარება. სამონადირო ტურები შეიძლება გახდეს რეგიონის ერთ-ერთი მთავარი ტურისტული მიმართულება, რაც ხელს შეუწყობს ლანჩხუთის ეკონომიკის გაძლიერებას.

შეიძლება მოეწყოს სათევზაო ტურებიც.

ეს ტერიტორია განსაკუთრებით საინტერესოა ეკოტურიზმის ერთ-ერთი ეგზოტიკური მიმართულებისთვის — ფრინველებზე დაკვირვებისთვის, ანუ ბერდვოჩინგისთვის (birdwatching). ბუნების მოყვარულებს და დამთვალიერებლებს აქ აგვისტოს ბოლოდან ოქტომბრის დასაწყისამდე შეუძლიათ გადამფრენ მტაცებელ ფრინველებს დააკვირდნენ. ამ მხრივაც, უნიკალური და მომგებიანი პოზიცია უკავია.

რატომ არ არის ლანჩხუთი ფართო საზოგადოებისთვის ცნობილი?

– რამდენიმე მთავარი პრობლემა არსებობს:

• პოპულარიზაციის ნაკლებობა – არ არის საკმარისი ინფორმაცია სოციალურ მედიაში და ტუროპერატორების კატალოგებში.

( სწორედ ამ მიზნით გაფორმდა Travel News – სა და ლანჩხუთის მუნიციპალიტეტს შორის მემორანდუმი )